Egun oskarbiak bikainak dira ibilbide hau egiteko, eta autoz proposatzen den arren, geldialdiak egin daitezke herrixka bakoitzean, inguruneaz eta paisaiaz gozatzeko; opari bat gure begietarako.

Ibilbidea Urduñan hasten da, A3931 errepidean barrena, Antiguako Santutegiranzko norabidean. Errepideak herrixketaraino eramango gaitu, eta Lendoñogoitin eta Mendeikan desbideratu egin beharko dugu.

Lendoñobeitin bisitatu errota eta Pozako ermita, Poza Lizentziatuaren jatorria.

Eta ibilalditxo bat egin nahi baduzu, Lendoñobeititik Lendoñogoitira oinez joatea proposatzen dizugu; edo Mendeikatik Babiora, Aiarako ikuspegiaz gozatzeko.

Urduñak deskonektatzeko gonbita egiten dizu, leku magiko batean. Orbel hotsa eta txori kantak baino ez dituzu entzungo.

Gero eta jende gehiagok jotzen du basora, paseatzera, hiriko bizimodu estresagarriaren ondorioei aurre egiteko. “Baso bainuak” izeneko jardueraz ari gara, eta gero eta medikuntzako profesional gehiagok diote propietate terapeutikoak dituela.

Gorobel Mendilerroan beren baitan unibertso baketsu bat daukaten pagadiak aurkituko dituzu. Zatoz urtaro bakoitzean, eta ikusi nola aldatzen den dena. Egin bat naturarekin, eta utzi basoari ongizateranzko bidea erakusten.

Edozer gauza gerta daiteke Santiago Mendiko bidexketan barneratzen bazara edo Txarlazo edo Iturrigorri gailurretaranzko igoerari ekiten badiozu.

Tertanga Arrastaria osatzen duten lau herri txikietako bat da, eta bertako amildegia leku harrigarri eta basatia dugu. Bertara iristeko, 625 errepidean, Urduñako mendatea hasi baino lehen, eskuinaldera sartu.

Egizu ibilalditxo bat bideak aukera ematen duen lekuraino. Eta behin iritsitakoan, gelditu, erreparatu Fraideburuko kareharri masa ikaragarriari, eta bizi txoko zirraragarri hori aurkitu izanak eragiten duen sentsazio aparta. Benetako altxor ezkutua.

Gorobel Mendilerroa klima atlantikoaren eta mediterraneoaren artean kokatuta dago, eta horren ondorio da bertako aberastasun botaniko nabarmena.

Bertako landare dibertsitateaz gozatu nahi baduzu, udaberria aukera paregabea duzu. Hartu lupa, eta abiatu Antiguako Santutegitik Txarlazorantz; igoeran zehar gorostiak, basa orkideak, otsababak eta mendiko belar bedeinkatua aurkituko dituzu; Goldetxoko iturriaren inguruetan, landare intsektujaleak; eta behin Goldetxoko ataka gurutzatutakoan, uso belarrak, Erinus alpinus eta Chondrilla juncea.

Gailurrera iristean, gerturatu Antiguako Andre Mariaren monumentura eta gozatu bailarako ikuspegiaz.